Guitiriz prepárase para a XII edición do concurso de tapas ‘Que bo estás Guitiriz’ do 9 ao 15 de marzo

03/03/2026

O vindeiro luns, 9 de marzo, arrincará a duodécima edición do concurso de tapas ‘Que bo estás Guitiriz’. O certame, organizado un ano máis pola Asociación de Hostalería de Guitiriz ‘Debares’, estenderase durante 7 días ata o domingo 15 de marzo.

Nesta edición participarán un total de sete locais repartidos pola vila. Os establecementos e as súas propostas gastronómicas son os seguintes: Restaurante O Korreo (“Coral sobre Nácar”), Café Pub SOA (“Kino Dulzón”), Casa Nistal (“Morocha do Mar”), A Capela (“Freixón Tropero”), Balneario de Guitiriz (“Tataki de Suprema”), Hostal La Casilla (“Operación Bikini”), e O Galo Checo (“#Queninpintada”).

O horario oficial para poder degustar as tapas será tódolos días de 20:00 a 23:00 horas. Cada unha das tapas terá un prezo de 3 euros, mentres que o custo será de 4,50 euros se se desexa acompañar co viño oficial do concurso.

A clientela atopará nos propios locais as cartillas de participación. Tras consumir e aboar a tapa, o establecemento deberá selar a súa casiña correspondente. Para que os votos emitidos sexan válidos e para poder optar aos premios económicos, as persoas participantes necesitarán ter selado o total dos sete establecementos.

O sistema de votación irá do 1 (nota mínima) ao 10 (nota máxima). Á hora de puntuar, deberase valorar especialmente o servizo, a presentación e o sabor da tapa.

As persoas que completen a ruta poderán depositar as súas cartillas nas furnas habilitadas nos locais, podendo participar tantas veces como desexen. Entre todos os participantes sortearanse tres premios: un primeiro de 500 euros, un segundo de 200 euros e un terceiro de 50 euros.

As furnas retiraranse o domingo 15 de marzo ao rematar o horario oficial do concurso. Posteriormente, o mércores 18 de marzo, o Café Pub SOA acollerá o reconto público de votos, onde se nomearán as tapas gañadoras por votación popular e sortearanse os premios entre os clientes.

Concurso de tapas Guitiriz 2026 – tríptico 2

O artigo Guitiriz prepárase para a XII edición do concurso de tapas ‘Que bo estás Guitiriz’ do 9 ao 15 de marzo publicouse primeiro en Concello de Guitiriz.