A Aula CeMIT acollerá unha formación sobre seguridade e uso responsable de móbil o 30 de abril

22/04/2026

A Aula CeMIT de Guitiriz organiza unha nova actividade formativa centrada na seguridade dixital. Baixo o título ‘Uso seguro do móbil: configuración e protección’, a sesión terá lugar o vindeiro xoves, 30 de abril, e está dirixida a todas aquelas persoas interesadas en mellorar a súa protección no ámbito dixital e adquirir boas prácticas no uso dos dispositivos móbiles.

A charla, programada de 10:30 a 12:00 horas, ten como obxectivo ofrecer ferramentas sinxelas e útiles para protexer a información persoal, evitar posibles fraudes e aprender a configurar correctamente os teléfonos móbiles. Durante a actividade abordaranse cuestións clave como a creación de contrasinais seguros, a configuración da privacidade, a identificación de mensaxes sospeitosas e o uso responsable das aplicacións.

A formación será impartida por persoal especializado en competencias dixitais e está pensada para un público xeral, polo que non se requiren coñecementos previos. Ademais, as persoas asistentes poderán resolver dúbidas e adquirir hábitos que contribúan a unha experiencia dixital máis segura no seu día a día.

A participación é gratuíta, aínda que se recomenda realizar inscrición previa chamando ao teléfono 982 37 00 62.

O artigo A Aula CeMIT acollerá unha formación sobre seguridade e uso responsable de móbil o 30 de abril publicouse primeiro en Concello de Guitiriz.