Os ‘Obradoiros contra a Desinformación’ chegan a Guitiriz o 18 de setembro

25/08/2026

A Escola Habanera, emblemático edificio que acolle a biblioteca municipal do Concello de Guitiriz, será o venres 18 de setembro a sede da actividade ‘Obradoiros contra a Desinformación’, organizada polo Colexio Profesional de Xornalistas de Galicia en colaboración e co financiamento da Deputación de Lugo.

Este taller, que terá uns 90 minutos de duración aproximada e que está adaptado para xente adulta, será impartido por profesionais especializados da entidade xornalística. A sesión combinará teoría e práctica e fomentará a participación para axudar ás persoas presentes a identificar información fiable, recoñecer contidos falsos ou enganosos e entender os procedementos de difusión da desinformación na era dixital que estamos a vivir.

O obxectivo final desta actividade é proporcionar á veciñanza ferramentas das que valerse á hora de desenvolver o seu pensamento crítico e non caer nos bulos que circulan por internet e, especialmente, polas redes sociais.

O obradoiro comezará ás 19:30 horas, con entrada de balde ata completar aforo.

O artigo Os ‘Obradoiros contra a Desinformación’ chegan a Guitiriz o 18 de setembro publicouse primeiro en Concello de Guitiriz.