Modificacións no calendario de rutas do ‘Guitiriz en Ruta’ 2026

16/10/2026

O Concello de Guitiriz informa de cambios no calendario do programa ‘Guitiriz en Ruta’, posto en marcha polas Escolas Deportivas Municipais coa colaboración do Concello. A Ruta da Cova da Serpe, inicialmente prevista para o 25 de outubro, aprazarase á próxima edición do programa, que será a novena e se celebrará en 2027.

No seu lugar, o domingo 25 de outubro terá lugar a Ruta da Fervenza, en Lugo, cunha saída prevista ás 9:00 horas desde a praza do Campo da Feira de Guitiriz. Esta andaina estaba programada inicialmente para o 29 de novembro, data na que finalmente non se celebrará ningunha ruta ao coincidir coas Eleccións Xerais.

Deste xeito, en lugar das tres rutas previstas inicialmente, serán dúas as que se desenvolverán no que resta da oitava edición de ‘Guitiriz en Ruta’. Mantense a cita do domingo 20 de decembro coa Ruta da Auga de Parga a San Alberte – Camiño Norte de Santiago, que sairá ás 10:00 horas desde as instalacións do CIT de Parga e terá o regreso previsto arredor das 14:00 horas.

Como é habitual, as rutas estarán abertas ao público en xeral, aínda que as persoas menores de idade deberán ir acompañadas dunha persoa adulta. As inscricións poderán realizarse presencialmente na Casa do Concello ou a través do teléfono 982 37 01 09, ata as 14:00 horas do venres anterior á celebración de cada andaina.

A participación nas rutas que se desenvolven dentro do termo municipal de Guitiriz é gratuíta. No caso das rutas fóra dos límites municipais, o prezo será de 5 euros para as persoas empadroadas en Guitiriz e de 10 euros para as non empadroadas.

O artigo Modificacións no calendario de rutas do ‘Guitiriz en Ruta’ 2026 publicouse primeiro en Concello de Guitiriz.