Os vehículos clásicos toman Guitiriz coa celebración do XXII Rally Rías Altas de Regularidade

24/10/2026

Este sábado celebrouse o XXII Rally Rías Altas de Regularidade, que contou coa participación de 43 pilotos. A proba foi organizada polo Moto Club Coruña-Escudería Centollo, coa colaboración do Concello de Guitiriz e do Iberik Gran Balneario de Guitiriz.

A competición percorreu en torno aos 300 quilómetros por 19 concellos das provincias da Coruña e Lugo, cun formato que permitiu aos participantes escoller entre realizar o percorrido de mañá, o de tarde ou a xornada completa.

A modalidade matutina saíu de O Burgo, en Culleredo, ás 9:00 horas. Pola tarde, os vehículos clásicos partiron a partir das 16:00 horas desde a praza do Campo da Feira de Guitiriz, un dos puntos centrais da proba. A chegada tivo lugar no Iberik Gran Balneario de Guitiriz, arredor das 21:30 horas, onde se celebrou a entrega de premios e a cea de confraternización entre os participantes e representantes das entidades colaboradoras.

O rally contou con vehículos clásicos fabricados antes do 31 de decembro de 1995, que debían cumprir os requisitos técnicos e administrativos establecidos pola organización, así como a normativa de circulación vixente. A modalidade de tarde dispuxo dunha clasificación independente da correspondente ao percorrido completo.

O artigo Os vehículos clásicos toman Guitiriz coa celebración do XXII Rally Rías Altas de Regularidade publicouse primeiro en Concello de Guitiriz.