Antonio Prieto e Jorge González gañan o XXII Rally Rías Altas de Regularidade e Juan Recimil e Alejandro Barrio vencen na modalidade de tarde

25/10/2026

Onte, sábado 24 de outubro, celebrouse o XXII Rally Rías Altas de Regularidade, organizado polo Moto Club Coruña-Escudería Centollo, coa colaboración do Concello de Guitiriz e do Iberik Gran Balneario de Guitiriz.

A proba contou coa participación de 43 pilotos e cun percorrido duns 300 quilómetros por 19 concellos das provincias da Coruña e Lugo. A competición ofreceu a posibilidade de participar no tramo de mañá, no de tarde ou na xornada completa.

A modalidade de tarde tivo a saída na praza do Campo da Feira de Guitiriz e a chegada no Iberik Gran Balneario de Guitiriz, onde se celebrou a entrega de premios e a cea de confraternización.

Nesta edición, o primeiro posto foi para o vehículo WW Sirocco, conducido polo piloto Antonio Prieto e o copiloto Jorge González, da escudaría Arenteiro Clásicos. Na xornada da tarde o gañador foi o Toyota Celica 2.0 GT conducido por Juan Recimil e Alejandro Barrio da escudaría O Toxo.

Ao remate da competición, celebrouse unha cea de confraternización no Iberik Gran Balneario de Guitiriz, durante a cal se entregaron os trofeos aos gañadores. No acto participaron os competidores e representantes das entidades organizadoras, e colaboradoras, así como Daniel Val, director de Iberik Balneario.

O artigo Antonio Prieto e Jorge González gañan o XXII Rally Rías Altas de Regularidade e Juan Recimil e Alejandro Barrio vencen na modalidade de tarde publicouse primeiro en Concello de Guitiriz.