O circuíto do Campo da Feira xa está preparado para acoller este sábado, 20 de novembro, o ‘II Slalom Concello de Guitiriz Gran Premio Roteiro da Auga’, organizado conxuntamente coa Escudería Scratch Fene.

A proba automobilística, de carácter nacional e puntuable para o Campionato de Galicia de Slalom, foi presentada hoxe na Casa Habanera pola alcaldesa de Guitiriz, Marisol Morandeira, o xefe do Servizo de Deportes da Xunta de Galicia en Lugo e Édgar Vigo, do comité organizador.

A competición iniciarase o sábado ás 15:45 horas pero o comezo da proba está previsto para as 8:30 horas, momento no que terán lugar as verificacións técnicas. Posteriormente, terá lugar o tradicional briefing cos pilotos e publicarase a listaxe de admitidos para comezar as dúas mangas de adestramentos a partir das 11 horas.

O prazo para anotarse aínda remata mañá, mércores 17 de novembro, ás 20 horas. Os interesados ou interesadas deben enviar un correo electrónico a edvilo@hotmail.com e poden solicitar máis información no teléfono 671 508 162.

Nesta segunda edición do Slalom o trofeo feminino, dotado con 300 euros de premio, está patrocinado pola Asociación de Hostalería de Guitiriz ‘Debares’ e, ademais das dúas pilotas que participaron o ano pasado e que repiten, a organización conta con que se inscriban dúas máis.

A día de hoxe hai 26 inscritos e a organización agarda achegarse finalmente aos 40. Cabe destacar que participarán pilotos da talla de Manuel Trevín, campión do I Slalom Concello de Guitiriz e campión galego 2020, Sergio Pena, campión galego do 2019, e Rubén Gandoy, campión de Asturias e campión galego.

Marisol Morandeira, agradeceu o traballo da escudería e quixo salientar a “aposta do concello por esta competición, referendada na celebración desta segunda edición” e animou á xente “a que se pase este sábado polo Campo da Feira para coñecer esta modalidade automobilística tan vistosa”.

Manuel Otero eloxiou “esa aposta que fai o Concello de Guitiriz polo deporte, sendo un dos máis activos dunha provincia que ten unha cultura do automóbil moi grande e que esta proba ven a complementar”.

Pola súa banda, Édgar Vigo quixo agradecer ao concello que se faga “esta segunda edición nun contexto sanitario máis positivo que a primeira, aínda que tamén haberá un protocolo de seguridade”. “Vai a ser unha das carreiras con maior inscrición nesta temporada xa que este slalom, xunto co de Fene, son os dous que teñen máis coeficiente de puntuación”, subliñou.

Dispositivo de tráfico

Estará prohibido estacionar dende o venres 19 ás 22:00h ata o sábado 20 ás 22:30h, nas seguintes rúas:
- Praza Campo da Feira (entorno a Igrexa e a Praza)
- Rúa Río Forxá
- Rúa As Costaneiras
- Rúa Candea

O tráfico permanecerá cortado o sábado 20 dende ás 8:00h ata ás 22:30h:
- Rúa do Mercado
- Rúa Deputación
- Avenida Poeta Diaz Castro (dende o cruce coa Rúa Xermade)
- Praza Campo da Feira (entorno a Igrexa e a Praza)
- Rúa Río Forxá
- Rúa As Costaneiras
- Rúa Candea
- Paseo dos Sete Muiños