O Concello remata os traballos de renovación de toda a iluminación pública a tecnoloxía LED

06/11/2025

O Concello de Guitiriz vén de concluír os traballos de renovación integral de toda a iluminación pública, substituíndo as antigas luminarias pola tecnoloxía LED. Esta actuación supón un importante avance para o municipio tanto en materia de eficiencia enerxética como de sustentabilidade ambiental.

A intervención abrangueu todas as parroquias do concello, con traballos de substitución de luminarias e renovación dos cadros de mando. En total, instaláronse 1.780 novas luminarias LED, da man da empresa adxudicataria Alisea ESCO S.A., o que eleva a 2.880 o número total de puntos de luz no municipio. Deste modo, máis do 60% do alumeado público municipal foi modernizado.

O Concello solicita agora á veciñanza que comunique calquera punto de luz no que non se realizara a substitución, co obxectivo de asegurar que a renovación chegue a todo o territorio e que o servizo funcione nas mellores condicións posibles.

O proxecto forma parte dun contrato de xestión integral do alumeado público, cunha duración de 20 anos e un investimento total de 6,1 millóns de euros. Este contrato inclúe o subministro, mantemento e reparación das instalacións, así como a xestión enerxética dos edificios e servizos municipais.

Esta fórmula permitirá ao Concello dispor dunha tarifa estable durante todo o período de vixencia, evitando o impacto das flutuacións no prezo da electricidade. Así, en 2025, o gasto máximo previsto ascende a 287.000 euros (IVE incluído).

A renovación supón tamén un notable salto en eficiencia, xa que a potencia instalada nas zonas renovadas pasa de 158 kW a 69 kW, o que representa un aforro enerxético do 56%. Ademais de reducir o consumo, mellóranse os niveis lumínicos, garantindo un alumeado máis uniforme, eficiente e seguro en rúas e espazos públicos.

A investimento total para esta actuación específica, que inclúe luminarias, instalación e enxeñaría, ascende a 669.009 euros (IVE incluído), dentro do marco global da adxudicación municipal.

Con esta actuación, o Concello de Guitiriz dá un paso decisivo cara un modelo de alumeado público máis sostible, combinando aforro económico, eficiencia tecnolóxica e mellora da calidade do servizo para toda a veciñanza.

O artigo O Concello remata os traballos de renovación de toda a iluminación pública a tecnoloxía LED publicouse primeiro en Concello de Guitiriz.