A Festa dos Xubilados e Xubiladas do Concello de Guitiriz reunirá a medio millar de participantes

20/05/2026

O Concello de Guitiriz celebrará o xoves 21 de maio unha nova edición da tradicional Festa dos Xubilados e Xubiladas, unha cita xa consolidada no calendario social do municipio e que reunirá arredor de medio millar de persoas.

O evento dará comezo ás 14:00 horas no Pavillón Municipal Jonathan Carro Paz, escenario desta xornada de convivencia dirixida ás veciñas e veciños maiores de 65 anos.

As persoas asistentes poderán desfrutar dun xantar pensado para compartir unha tarde de lecer, encontro e diversión, na que non faltarán a música, o baile e a boa compañía.

Tras a recepción das persoas participantes, está previsto que o xantar comece arredor das 14:30 horas e se prolongue ata aproximadamente as 16:30 horas. A continuación celebrarase un sorteo de agasallos entre as persoas asistentes.

A programación continuará cunha animada tarde musical e de baile coa actuación en directo de Nerea Cobas, que será a encargada de poñer o broche festivo a esta celebración.

O artigo A Festa dos Xubilados e Xubiladas do Concello de Guitiriz reunirá a medio millar de participantes publicouse primeiro en Concello de Guitiriz.